پاکستان میں ٹِک ٹاک بند ہو گی یا نہیں؟ تفصیلات جاری کرنے کی ہدایت
پی آئی سی نے پی ٹی اے سے ٹک ٹاک پر پابندی کے اجلاس سے متعلق تفصیلات طلب کر لیں۔
تفصیلات کے مطابق پاکستان انفارمیشن کمیش نے پاکستان ٹیلی کمیونیکیشن اتھارٹی (پی ٹی اے) سے ٹک ٹاک پر پابندی سے متعلق اجلاس کے منٹس اور تفصیلات فراہم کرنے کی ہدایت جاری کر دی ہے۔
کمشنر زاہد عبداللہ نے ندیم عمر کی جانب سے دائر شکایت پر حکم جاری کر دیا، ندیم عمر نے پی ٹی اے کی جانب سے پاکستان میں ٹِک ٹاک پر پابندی سے متعلق معلومات حاصل کرنے کی درخواست دائر کی تھی۔
تاہم درخواست کو مدِ نظر رکھتے ہوئے پی آئی سی نے پی ٹی اے کو ہدایت کی کہ وہ درخواست دہندہ کو 10 روز میں ٹک ٹاک پر پابندی سے متعلق تفصیلات اور اجلاس کے منٹس سے متعلق معلومات فراہم کرے۔
جاری کردہ حکم نامے میں کہا گیا ہے کہ 'پی ٹی اے کو ہدایت کی جاتی ہے کہ وہ درخواست گزار (ندیم عمر) کو مطلوبہ معلومات، ٹک ٹاک کے خلاف صوبے اور ضلع کے لحاظ سے موصول ہونے والی شکایات کی مجموعی تعداد فراہم کریں'۔
حکم نامے میں ٹیلی کام ریگولیٹر پی ٹی اے کی جانب سے ٹک ٹاک انتظامیہ کو ارسال کیے گئے خطوط اور ای میلز کی کاپیاں، ٹک ٹاک انتظامیہ کی جانب سے موصول ہونے والے خطوط اور ای میلز کی کاپیاں اور اجلاس کے منٹس اور نوٹس کی کاپیاں بھی فراہم کرنے کی ہدایت کی گئی ہے جس میں پی ٹی اے نے سوشل میڈیا پلیٹ فارم پر پابندی عائد کرنے کا فیصلہ کیا تھا۔
چینی کمپنی کی ملکیت ٹک ٹاک ایپ پر مبینہ طور پر 'غیر اخلاقی مواد' کے خلاف پی ٹی اے کی جانب سے متعدد وارننگز جاری کیے جانے کے بعد اکتوبر کے مہینے میں پابندی عائد کی گئی تھی جبکہ بعدِ ازاں پی ٹی اے نے شرائط اور وارننگز کے ساتھ ٹک ٹاک کو پاکستان میں ایک بار پھر بحال کر دیا تھا۔
یاد رہے کہ پاکستان کے شہریوں کو یہ حق حاصل ہے کہ وہ ٹک ٹاک ایپ یا کسی بھی دوسری ایپ پر پابندی کی وجہ بننے والی فائلز اور اجلاس کے منٹس تک رسائی حاصل کر سکیں تاکہ وہ افسران کی جانب سے فراہم کردہ مواد پر جائزہ لے سکیں کہ حتمی فیصلے کے ذریعے پابندی کیوں لگائی گئی۔
Comments
Post a Comment